Exodus 34

Izibhebhedu ezintsha zamatshe

1UJehova wathi kuMosi, “Baza izibhebhedu ezimbili zamatshe anjengawakuqala. Ngizaloba kuwo amazwi ayesezicecedwini zakuqala owaziphahlazayo.

2Ube usulungile ekuseni, ubuye phezulu entabeni iSinayi, uziveze kimi engqongweni yentaba. 3Akungabi lamuntu oza lawe kumbe oke abonakale loba kungaphi entabeni; ngitsho lezimvu lezinkomo kazingadli phambi kwaleyontaba.”

4Ngakho uMosi wabaza amatshe amabili aba njengawokuqala, wakhwela entabeni iSinayi ekuseni kakhulu njengokulaywa kwakhe nguJehova ephethe izibhebhedu ezimbili zamatshe ngezandla zakhe. 5UJehova wehla ngeyezi wema khonapho laye wamemezela ibizo lakhe esithi, “UJehova.” 6Wadlula phambi kukaMosi ememezela esithi, “UJehova, UJehova; uNkulunkulu olesihawu lomusa, ophuzayo ukuthukuthela, ogcwele uthando lobuqotho,

7olothando olungapheliyo kuzinkulungwane ethethelela ububi, iziphosiso lezono. Ikanti abalamacala kabayekeli bengajeziswanga; wehlisela ububi baboyise phezu kwabantwana, laphezu kwabantwana babantwana kusiya kusizukulwane sesithathu lesesine.”

8UMosi waphanga wakhothamisela ikhanda lakhe phansi, wakhonza. 9Wathi, “Awu Jehova, uma ngithole umusa kuwe, ngiyacela, uJehova kahambe lathi. Lanxa abantu laba bentamo zilukhuni, sithethelele ububi bethu lezono zethu, usithathe njengelifa lakho.”

10UJehova wasesithi, “Sengisenza isivumelwano lawe. Phambi kwabantu bakho bonke ngizakwenza izimangaliso ezingakaze zenziwe lanini lakusiphi isizwe emhlabeni wonke. Abantu ohlala phakathi kwabo bazabona ukuthi wesabeka njani umsebenzi, mina uJehova, engizakwenzela wona. 11Lalela lokhu engikulaya khona lamhla. Ngizawaxotsha phambi kwakho ama-Amori, amaKhenani, amaHithi, amaPherizi, amaHivi lamaJebusi.

12Qaphela ukuba kungabi lesivumelwano osenza lalabo abahlala elizweni oya kulo ngoba bangaba yisithiyo kini. 13Alibowadiliza amaalithare abo, libhidlize lezithombe zabo, ligamule lezinsika zika-Asheri wabo abamkhonzayo. 14Lingakhonzi omunye unkulunkulu, ngoba uJehova, obizo lakhe linguBukhwele, nguNkulunkulu olobukhwele.

15“Qaphelani lingenzi isivumelwano lalabo abahlala elizweni lelo, ngoba nxa bezibhixa kubonkulunkulu babo benikela iminikelo kubo, bazalinxusa libeselisidla imihlatshelo yabo.

16Njalo lapho likhetha amanye amadodakazi abo ukuba abe ngabafazi bamadodana enu kuzakuthi lapho amadodakazi lawo esezibhixa kubonkulunkulu bawo, ahugele amadodana enu ekwenzeni okunjalo.

17“Lingazenzeli onkulunkulu ababunjiweyo.

18“Gcinani umkhosi weSinkwa Esingelamvubelo. Okwezinsuku eziyisikhombisa dlanini isinkwa esenziwe kungekho mvubelo, njengokulaya kwami. Lokho kwenzeni ngesikhathi esimisiweyo enyangeni ka-Abhibhi, ngoba ngaleyonyanga laphuma eGibhithe.

19“Inzalo yakuqala yezizalo zonke ngeyami, kanye lamazibulo wonke amaduna ezifuyo zenu, loba engawenkomo kumbe awezimvu.

20Izibulo likababhemi lihlengeni ngezinyane. Kodwa uma lingalihlengi lephuleni intamo yalo. Ahlengeni wonke amadodana enu angamazibulo. “Kakho ozakuza phambi kwami engaphethe lutho.

21“Lizasebenza izinsuku eziyisithupha, kodwa ngosuku lwesikhombisa lizaphumula; langesikhathi sokulima lesokuvuna kuzamele liphumule.

22“Gcinani umkhosi wamaviki awokuvuna kwasekupheleni komnyaka. 23Kathathu ngomnyaka bonke abesilisa bakho babonakale phambi kukaJehova uNkulunkulu, uNkulunkulu ka-Israyeli. 24Izizwe eziphambi kwenu ngizazixotsha ngiqhelise ilizwe lenu, njalo kakho ozahawukela ilizwe lenu ngesikhathi lisiyabonakala phambi kukaJehova uNkulunkulu wenu kathathu ngomnyaka.

25“Linganikeli igazi lomhlatshelo kimi lolutho olulemvubelo, njalo akungabi lomhlatshelo womkhosi wePhasika ogcinwa kuze kuse.

26“Lethani izithelo zenu zakuqala ezinhle kakhulu zemasimini enu endlini kaJehova uNkulunkulu wenu. “Lingapheki izinyane lembuzi ngochago lukanina.”

27UJehova wasesithi kuMosi, “Loba amazwi la, ngoba ngamazwi la sengenze isivumelwano lawe kanye lo-Israyeli.”

28UMosi wayekhonale loJehova izinsuku ezingamatshumi amane lobusuku obungamatshumi amane engadli sinkwa kumbe ukunatha amanzi. Amazwi esivumelwano – lemilayo elitshumi – wawaloba ezibhebhedwini zamatshe.

Ubuso obukhazimulayo bukaMosi

29Kwathi lapho uMosi esehla entabeni iSinayi ephethe izibhebhedu ezimbili zamatshe obuFakazi, wayengazi ukuthi ubuso bakhe babukhazimula ngenxa yokuthi wayekhulume loJehova. 30Kwathi u-Aroni labo bonke abako-Israyeli bebona uMosi, ubuso bakhe bukhazimula ngenxa yokuthi wayekhulume loJehova, besaba ukusondela kuye. 31Kodwa uMosi wababiza; ngakho u-Aroni lezinduna zonke zabantu beza kuye, wakhuluma labo.

32Emva kwalokho bonke abako-Israyeli basondela kuye wabanika yonke imilayo kaJehova ayemuphe yona entabeni iSinayi.

33UMosi eseqedile ukukhuluma labo, wamboza ubuso bakhe ngeveli. 34Kodwa kwakusithi lapho esengena ukuba abe phambi kukaJehova ukuze akhulume laye, wayelisusa iveli aze aphume. Wayesithi angaphuma, njalo esebatshelile abako-Israyeli lokho ayekulayiwe,

35babebona ukuthi ubuso bakhe babukhazimula. Lapho-ke uMosi wayebumboza njalo ubuso bakhe ngeveli aze angene esiyakhuluma loJehova.